Gutti

Guðbjartur Hannesson

Ég er alþingismaður og þessa dagan forseti Alþingis.  Var kosinn á Alþingi í maí 2007, sem 2. þingmaður NV-kjördæmis og efsti maður á lista Samfylkingarinnar í sama kjördæmi.  Ég var formaður félags- og trygginganefndar og sat einnig í menntamálanefnd og fjárlaganefnd þar til ég varð forseti þingsins 1. febrúar 09.

Ég er kennari að mennt frá KÍ, en einnig með tómstundakennarapróf frá Köben og meistaranám í “Fjármálum og menntun” frá Lundúnarháskóla. 

Ég er fæddur og uppalinn á Akranesi og starfaði sem skólastjóri Grundaskóla á Akranesi í 25 ár. 

Ég sat í bæjarstjórn á Akranesi í 12 ár og var öll árin jafnframt í bæjarráði.  Ég var bæði formaður bæjarráðs og forseti bæjarstjórna.  Þá starfaði ég 5 ár í bankaráði Landsbanka Íslands og var jafnframt eitt ár í bankaráði Heritable-banka í London (eign LÍ).  Ég hef setið í ýmsum ráðum og stjórnum, m.a. útgerða- og orkufyrirtækja.  Ég hef unnið að skipulagsmálum og málefnum fatlaðra á Vesturlandi.  Ég sat í svæðisráði fatlaðra á Vesturlandi og stýrði því um tíma.  Þá hefur ég gegnt margs konar trúnaðarstörfum tengdum skólastarfi.  Ég átti sæti í stjórn Samtaka sveitarfélaga á Vesturlandi í nokkur ár sem og í fulltrúaráði Sambands íslenskra sveitarfélaga.

Ég er skáti og var á yngri árum erindreki og framkvæmdastjóri Bandalags íslenskra  skáta.  Auk þess hef ég setið í stjórnum íþróttafélaga á Akranesi.Ég sat í miðstjórn og framkvæmdastjórn Alþýðubandalagsins og gegndi þar formennsku. 

Ég er einn af stofnfélögum Samfylkingarinnar og fyrsti formaður Akraneslistans forvera Samfylkingarinnar á Akranesi.  

Ég er giftur Sigrúnu Ásmundsdóttur iðjuþjálfa.  Við eigum tvær dætur, Birnu og Hönnu Maríu.